Our Blog

Zenbat buru, hainbat aburu. Euskal sortzaileen marrazkiak

Artikuloak hainbat euskal arkitektoren marrazkien bilketa bat erakusten du, sortzaile bakoitzari emanez bere obra baten prozesuan agertu diren apunte, marrazki edo diagramak libreki adierazteko aukera, eta, hortaz, hainbat sortzaileren mosaiko bat eratuz.

Maiz, arkitektura azaltzeko hizkuntza «natural» bati heltzen diogu arkitektook, hots, sentsibilitatea eta adimena dituen orok ulertuko duen lengoaia bat erabiltzen dugu gure ideiak azaltzeko. Hor daude, bada, hizkuntza natural horren adibide, arkitektura-tratatuak, XVI. mendean ospe handia hartu zutenak jauntxoen artean, edo, XX. mendera jauzi eginez, Rem Koolhasek egindako Delirious New York liburua.

Hizkuntza natural horretatik at, arkitektoon ideiak adierazteko hizkuntza «grafiko»ari ekiten diogu, marrazkiak erabiliz esanahi bat emateko testuari eta gure ideiei. Horrela, bada, hainbat irudi edo marrazki oso ideia famatuen adierazle bilakatu dira, hala nola Robert Venturi eta Dennise Scott-Brownen «I am a monument» adiera, Le Corbusierren Modulorra, Mies vander Roheren Adreiluzko Etxea…

Arkitekto bakoitzak badu ideia jakin bat adierazteko modu berezia, eta sarritan eraikinarena bera ideia bilakatzen da; 1922an, ospe eta hedapen handia lortu zuen Chicago Tribune egunkarirako lehiaketak, Walter Gropius, Adolf Loos, Bruno Taut edo Eliel Saarinen arkitekto ezagunen ekarpenekin. Esaera zaharrak dioen bezala, «zenbat buru, hainbat aburu», eta lehiaketarako ideia nagusiak ―«munduko bulego-eraikin ederrena eta bereizgarriena eraikitzea» lehiaketako oinarriek zioten bezala― momentuko buru adimentsuenen interpretazioa jaso zuen, irudietan islaturik.

Ondoren, euskal arkitekto batzuen jarduera arkiktetonikoan zehar burututako irudi edo marrazki batzuk azalduko ditugu, nonbait egungo sortzaileek darabilten mosaikoa lortzeko asmoz. Mosaiko edo lagin oro bezala, ez da osoa, eta sortzaile asko falta dira; edozein kasutan, ekarpenok goi-mailako arkitekturaren adibide dira, sortzaileen buruan sartzeko aukera ematen dute, pentsamendua objektu bilakatzen den momentu magiko horren adibide.

Rocio Peña Azpilicueta eta Mario Sangalli Uggeri (Peña Ganchegui y Asociados)

Rocio Peña Azpilicueta eta Mario Sangalli Uggeri, Luis Peña Gancheguirekin batera Donostiako “Peña Ganchegui y asociados” arkitektura-estudioaren sortze-kideak dira, gaur egun estudioaren zuzendariak direlarik. Biek Bartzelonako Arkitektura Eskolan ikasi zuten, eta egun Mario Donostiako Arkitektura Eskolan proiektu-irakaslea da; Luis Peña maisua zendu ondoren, estudioak garai berri bati egin zion aurre, Donostiako Arkitektura Eskolaren sortzailearen ildo beretik. Oso aipagarriak dira Cementos Rezolako museoa, Bilboko Abandoibarrean 85 etxebizitzaren proiektua, Pasai Donibaneko Santio Plaza edota Andoaingo Bastero Kulturgunea. Hain zuzen ere, proiektu horren sorreraren plantak ditugu artikulu honetan ikusgai.

ganchegui

Miguel Gutiérrez García (Cooperactiva)

Arkitektura-estudio bilbotar hau 2004. urtean sortu zuten Miguel Gutiérrez Garcíak, Patxi Corcuera Bilbaok eta Ramiro Higuera Higuerak, eta beraiek dira estudioaren zuzendariak. Hiru arkitektoek Donostiako Arkitektura Goi Eskola Teknikoan ikasi zuten. Etxebizitza publikoan lan eskerga egindako estudioa da, batez ere Eusko Jaurlaritzako Visesa sozietaterako. Aipagarriak dira Ruben de Miguelekin batera, Bilbon egindako Errekalde auzoko 70 etxebizitza taldea, bai eta Bilboko San Anton aldeko 85 etxebizitza (Visesa Saria lortu zuen proiektua), bai eta ondo irudian agertzen zaigun Gasteizeko Zabalgana auzoko 84 etxebizitzatarako proiektua.

cooperactiva

Luis Mari Uriarte Aldaiturriaga (LM Uriarte Arkitektura)

Arkitekto arabarrak 1980. urtean amaitu zituen Arkitekturako ikasketak Madrilgo Arkitektura Goi Eskola Teknikoan, eta orduz geroztik tentu handiz aukeratu ditu egin beharreko lanak, kalitate handiko curriculuma Iruñeko Arkitektura Eskolan irakasle-lanak hartzen zituen bitartean. Bilboko Arte Ederren Museoaren handitzea da haren lanik ezagunenetako bat, eta gaur egun berak proiektaturiko Getxo Antzokiaren lanak egiten ari dira.

uriarte

 

Jabier Puldain Huarte

Jabier Puldain Huartek Madrilgo ETSAM eskolan ikasi zuen, eta Donostiako Arkitektura Goi Eskola Teknikoko proiektu-irakaslea eta doktorea da, ikerkuntza eta praktika profesionarekin osatuz bere jarduna. Haren obren artean hauek nabarmedu daitezke: Jose Ignacio Linazasorokin batera egindago Madrilgo UNEDeko liburutegia, Lekeitioko Barandiaran Kultura Aretoa eta Markinako Uhagon Kulturgunea.

puldain

Iñaki Arrieta Mardaras (Estudio K)

Iñaki Arrieta Mardarasek, getxotar algortarrak, 1974. urtean Bartzelonako Arkitektura Goi Eskola Teknikoan Arkitekturako ikasketak amaitu zituen. Gaur egun Estudio.k-ko koordinatzaile orokorra da, hirigintza, arkitektura eta ingeniaritza jorratzen dituen kooperatiba. Haren lan arkitektonikoen artean daude Bilbo Zaharreko Laguna, Cantalojas eta Gimansio kaleetan gauzatutako babes ofizialeko 40 etxebizitza, bai eta EHUko Leioako Campuseko berrikuntza-lanak bai. Jaso dituen sarien artean, irudiotan agertzen den lana dago.

estudioK

César Azcárate Gómez (ACXT)

Bilbon jaioa, 1991tik Nafarroako Arkitektura Goi Eskola Teknikoko arkitekto doktorea da eta urte horretatik Proiektu Arkitektonikoen irakasgaiko irakasle laguna da bertan. Doktore-tesian gari-siloen irudi arkitektonikoa aztertu zuen. IDOM ingeniaritzaren atal arkitektonikoko bazkidea da eta haren proiektu esanguratsuenen artean ditugu Athletic Futbol Cluben San Mames Barria futbol-estadioa, Bilbao Exhibition Centre (BEC), Ondarretako Polizi Komisaldegia eta Bilbao Arena kiroldegia.

azcarate

Maite Apezteguía Elso (Apezteguia Architects)

1979an Nafarroako Arkitektura Goi Eskola Teknikoan arkitekto hirigilearen titulua jaso zuen, eta eskola berean doktoretzako kurtsoak egin zituen 1981 eta 1982 urteen bitartean. 1986tik aurrera eskola berean irakasle-lanak burutu ditu. 2010. urtean Apezteguia Architects estudioa sortu zuen. Haren lanen artean, nabarmengarriak dira Gipuzkoako Industria, Nabigazio eta Merkataritza Ganbera eta, Nafarroan, Donamariako Jauregia Dorrearen zaharberritzea, zeinak EHAEO Sarien lehenengo postua jaso baitzuen zaharberritze-atalean 2003. urtean.

apezteguia

Argazki eta irudien jabego intelektuala arkitektoena da. Artikuloaren zabalpenerako baimena eman ziguten, eta gure eskerrik beroenak bidali nahi genizkieke. Bestelako erabilpenik ez dago onartua.

Agurtzane Elguren & Ibai Gandiaga

ADI! Bulegoa

Tags:

This is a unique website which will require a more modern browser to work! Please upgrade today!